XORNADA PRIMEIROS AUXILIOS E RCP BÁSICA

30 de maio, último día para a Inscrición

Máis información

#NOVOCEIPARTEIXOXA! #NOVOIESARTEIXOXA! #BACPASTORIZAXA!

Estes días atrás as palabras Educación e Arteixo apareceron con certa frecuencia en algún medio impreso e nas redes sociais. Parece que cada vez que o colectivo de nais e pais lanza unha proposta a respecto dunha problemática do sector, algo se move. Máis FEDART, xa que logo.

Dende a Federación, temos claro cal é en estes momentos o problema principal que lastra as posibilidades de desenvolver modelos educativos de calidade nos centros de Arteixo, a masificación, e xa que logo, levamos tempo insistindo en que é preciso poñer a andar xa un novo centro de primaria e un novo centro de secundaria.

Hai outras cuestións ás que atender para contribuír a ese permanente traballo de conseguir máis calidade educativa. Algunhas que afectan especificamente a circunstancias de cada centro, outras que necesariamente habería que abordar no conxunto da comunidade educativa de Arteixo.

O noso actual Alcalde aproveitou a onda para facer unha comunicación nos medios a respecto da idea que o seu partido ten para desenvolver a estrutura de escolarización para o Concello. Magoa que esta manifestación non se fixera nun espazo común onde as partes interesadas puideramos comentar o noso parecer ao respecto. Algo así como un Consello Escolar Municipal, órgano do que a Asemblea de FEDART acordou solicitar a súa constitución e posta en funcionamento.

Como representante principal de todo o Concello, é moi importante que tome a iniciativa a respecto de definir cal é o modelo de futuro para o sector educativo en Arteixo. Como líder da formación política que ten a maioría no noso Concello é completamente lóxico que teña a potestade para facer unha proposta de calado fronte á cidadanía e diante das administracións competentes. O papel que os concellos xogan neste eido educativo está moi limitado pola Lei de Bases de Réxime Local e algunha que outra lexislación estatal restritiva no que atinxe á disposición presupostaria. Pero o factor fundamental que decide a acción neste eido, e se pode ver con claridade en moitos exemplos ao longo do País, é a vontade política de querer facer. Que un Concello non teña unha Concellería de Educación, é un indicativo a respecto de como se define esa vontade política.

Mais, respectando e valorando a toma de postura da Alcaldía desenvolvida nos medios, a nós correspóndenos cando menos propoñer unha pregunta simple. Debera ser o sector educativo un espazo onde as decisións se tomen dende a exclusiva óptica dunha única opción política? Nós creemos que non. Apoiaremos as iniciativas que o Concello tome a respecto de conseguir máis e mellor calidade para o sector educativo de Arteixo. Si que é unha boa idea contar con máis oferta pública de FP aquí mesmo. Para o alumnado, para as familias. Para as empresas poida que tamén, pero iso é secundario. Pero ter máis FP, ou ter outro centro con BAC, #BACPASTORIZAXA!, non pode supoñer eliminar outras alternativas. E en calquera caso, debera ser todo o colectivo da comunidade educativa o que tomara as decisións a respecto de como organizarnos e desenvolver as opcións que se formulen. Practiquemos a pequena escala iso do PACTO EDUCATIVO. Poida que tamén sirvamos de exemplo para ese que levan intentando facer na capital do reino case que dende os tempos de María Castaña.

PRESENTACIÓN COLABORACIÓN BANCO DE ALIMENTOS

ACORDO CO BANCO DE ALIMENTOS

O Banco de Alimentos Rías Altas organiza para o venres 30/11 e o sábado 1/12 unha campaña de recollida de alimentos non perecedoiros en practicamente todos os super e hiper da provincia.

FEDART acordou con eles a colaboración para a organización e xestión das quendas de persoas voluntarias para o traballo de recollida do que a xente queira ir doando á saída das caixas. Imos intentar cubrir as quendas do LIDL, EROSKI e GADIS. Os tres que están situados na proximidade dos centros escolares do núcleo de Arteixo.

As persoas voluntarias: nais, pais, nenas e nenos, profesorado dos centros de ensino de Arteixo que decidan apuntarse. Todas as participantes asinarán un documento de participación do propio Banco de Alimentos e as menores (poden participar a partir de 8 anos) terán que aportar unha específica de autorización das súas persoas titoras. Todas as menores, de calquera idade ate os 16, deberán estar acompañadas necesariamente por persoas adultas durante a quenda de recollida.

Entendemos que esta acción formula posibilidades amplas para desenvolver algúns dos obxectivos curriculares dos diversos niveis de ensino. Nos consta que xa o curso anterior houbo quen decidiu tirar proveito da iniciativa dende algún dos centros de ensino. E ademais, permitirá seguir na dinámica de promover relacións entre os estamentos da comunidade educativa definidas en termos de cooperación e colaboración.

As quendas de recollida agrúpanse en períodos de dúas horas e media, salvo a que ocupa o horario de 15 a 17 hs. No caso de que haxa abundancia de solicitudes de participación ou moita participación de menores, reduciríamos a duración de cada quenda.

Creamos un correo específico para esta acción recollidanadalarteixo@gmail.com  no que inicialmente calquera persoa interesada en participar terá que dirixirse para apuntarse, e dende o que se lle solicitarán os datos pertinentes e estritamente necesarios. A organización posterior se desenvolverá polos medios que os colectivos acorden, considerando crear grupos específicos para cada super, con condicións de participación definidas. Tanto a conta de correo, como calquera outro medio dixital que se poida constituír para a xestión, e todos os datos recollidos, serán eliminados despois da acción.

O Banco de Alimentos conservará segundo a normativa de voluntariado, a documentación acreditativa dos participantes para os fins específicos recollidos na lei.

Un saúdo.

A Xunta Directiva de FEDART