Están desenvolvéndose os procesos de elección para representantes no Consello Escolar nos centros. Profesorado e PAS, onde non imos comentar nada máis que o bo desexo de que, esta vez si, en todos os centros haxa candidaturas por ambos sectores e moita participación. 👀 Ups… claro, para o sector de nais, pais e titores e para o sector de alumnado no caso dos IES, tamén agardamos o mesmo. Non lle imos pedir a uns o que outras non facemos.
Pero o que nos corresponde con claridade é falar da nosa representación nos Consellos. Nais, pais e persoas titoras dunha banda, alumnado doutra.
Para quen se presente. Parabéns pola decisión! ✊Contade coa nosa colaboración e axuda para difundir a vosa campaña electoral, se aínda hai tempo. E despois, o que vos pediríamos, tanto a adultos como a menores, é que actuedes como representantes. Quixeramos que se puideran desenvolver canles de comunicación abertos permanentes entre os electos e as persoas ás que representan, mesmo dun xeito institucional se fora posible, de maneira que se puidera facer chegar a información do que se trate e acorde nas reunións dos Consellos a toda a comunidade educativa representada. Entendemos que esta é a fórmula básica para por en valor o papel deste órgano de representación na vida escolar dos centros de Ensino Público, mesmo nas condicións restrinxidas que estableceu a lomce para o seu funcionamento. E evidentemente, para promover a educación na participación democrática entre o colectivo xeral do alumnado. Como se articule isto en cada centro e con cada colectivo, é algo que lle corresponde definir a cada comunidade.
Nós sempre teremos as portas abertas á colaboración para a mellora do funcionamento xeral dos centros e do sistema educativo formal en xeral con todas as partes representadas, nun marco de cooperación e diálogo construtivo.
E ás miles de persoas censadas para votar nas eleccións nos distintos centros, que lles imos pedir. Empezade por votar. 🗳 Un pequeno paso para unha persoa, un gran paso para a humanidade escolar. Que non teñamos que dicir aquilo de, Hiuston, temos un problema! 😄
